හිස් කුසැති ඇවිදින මරණ

නොහරිනු ඔය රිය කවුළු

නො බලනු අයදින දෑස් දෙස ඔය ඇවිදින මරණයයි අපි තිරයකින් නැරඹූ... නොයනු එපිටට ඔය පවුරු දොවනු ඇල්කොහොලින් දෑත ම උහු වපුරති විෂ බීජ ඉස්සරත් ඔහොමයි... අර ඇස් කෙවනි තුළ කළු බලන අප දෙස විමසන

ඇයි මේ අප පසුපසම

දිව යා යුතුය ඈතට... ගොමස්කඩ ගඳ වෙස් මුහුණු පිළුනු මුව ඒ තුළ දත් ඇදුන ඔය ඇවිදින මරණයයි අපි තිරයකින් නැරඹූ... මතු මහල මත අප සැඟවුණු ලියන කවි හෙම පිරි කුසින හිස් කුස මරණයක අරුම උන් සුඟක්වත් නොතකයි... ___________________________ © ඩිලන්ත පණ්ඩුක රත්නායක 14.11.2020

කාබන් පිය සටහන්

ටොන් ගාණක් වුවත්

එකතු කළ හැකි

ප්‍රතිපූර්ණය කළ නොහැකි

සීතල පාද පත්ලෙහි තැවරුණ

කාබන් වූ...සීතල වූ...

මිනිස් සුසුම්..

ඔය.. ඔය ..ඔබෙත්

නිහඬව සිටින මගෙත්

පා සටහන් අතරෙහි ම

ඇත..

පෙනෙනු නැත..

ඒ සිටවූ පැළ අතර...

_____________________________________

© ඩිලන්ත පණ්ඩුක රත්නායක

2019 ඔක්තෝම්බර්

(නිමිත්ත - ඔවුන් ආඩම්බරයෙන් කියූ ලෙස ඒ ලොව පළමු කාබන් හරණ ජනපතිවරණ ප්‍රචාරක වැඩසටහනයි. 2019 අග ලංකාවේ පැවැත්වුනි. එ දෙස බලා සිටින්නෙමු)

source: http://www.ft.lk/news/World-s-first-carbon-sensitive-environmentally-friendly-election-campaign/56-688820

ඇඟේ ගානට හෑරූ පොළොවේ හැමතැන සිදුරු.

එහේ විතරක් නොවෙයි.. මෙහෙත්..

ඇඟේ ගානට හෑරූ

පොළොවේ හැමතැන සිදුරු...

හැකිළී මියෙන

මුහුණු නැති

පුංචි උන් තනි වූ

දික්වූ දෑත් නැති

කරවුන දෑස් ඇති

වැලපෙති මහ එවුන්

එබෙමින්

මුවෙහි ඒ සිදුරු...

නොදැනම

මේ සිදුරු ඇරඹුම

උන් වැටුණු පතුළෙහි ම බව

අයදිති උන්ටම

සිදුරු සෑදූ

කියති උන්

දෝතට ම දෙන බව..

වතුරත්, අකුරුත්,

සෙනෙහසත්, සතුටත්

සේ සවන පැණි ලූ

එහෙත් ඒවා හොවා ඇත්තේ

නොදන්නා වූ

පතුළක කෙළවරය

ඉදින් කිව හැක

ඒ හරි අපූරු සිදුරු

කියති උන්

රැගෙන එන බව ගැලවුම...

ලනු ද, විදින කටු ද,

විශ්මිත තාක්ෂණය ද..

බැරිම උනොතින්

පුංචි සුරතල් පෙට්ටියක්

උන්ගෙ ගණනේ..

එහෙත් විතරක් නොව මෙහෙත්..

ඇඟේ ගානට හෑරූ

පොළොවේ හැමතැන සිදුරු...

_________________________

© ඩිලන්ත පණ්ඩුක රත්නායක

2019 ඔක්තෝබර් 

(Inspired by two years old child who were stuck in a deep ground hole in southern India and ended as a tragedy; his death while the whole country struggling in a rescue mission) 

https://www.nytimes.com/2019/10/29/world/asia/india-boy-well.html

දේශප්‍රේමී පවත

එතුමෝ

තම ගැඹුරු ස්වරයෙන්

කී කල්හි

᳓එව දේශප්‍රේමිය...᳓

එතෙක් පරිවාර ජනයා විසින් මැ

හණ ගසා

පරිභව කෙරෙමින් සිටි ඒ

කොටියාද,

කැලෑපාලුවාද,

ස්ත්‍රී දූෂකයාද,

පගා මරුවාද ආදී දන

එ සියල් නොපනත්කම් වලින් දුරුවැ ,

අශිෂ්ඨ සළු පිළි දූරිභූත වැ

සීතාම්බර පටයෙන් පමණක්ම සැරසී වන,

එතුමන්ගේ පාදස්පර්ශයෙන් සැනහෙමින් මැ

දේශප්රේමී කුලකයට එක්වන්නාහුය...

පරිවාර ජනයා

මේ මහා ආශ්චර්යය දැක

නෙත කඳුළු නංවමින් මැ

එතුමෝ අබියස

වීරාභිවාදන පවත්වන්නාහුය........

______________________________________

© ඩිලන්ත පණ්ඩුක රත්නායක

2018 නොවැම්බර්

නොහළ යදම් සහ කුරුසි

 නොහළ යදම් සහ කුරුසි

_____________

ගිගිරි නද නොව ඔය

ඇසෙන්නේ

සැලෙනා යදම් හඬය

නුඹේ කර මත ඇත්තේ

අහර පැසක් නොව

හිමිවරු නැඟි දෝලාවෙ බරය

පා වෙළෙවි වන්නේ

වාතය කිපී නොව

ඒ පා බැඳි යගුලිය බලව

ගත සරසවන්නේ ඔබ

පච්චයද නැතිනම්

හිමියන්ගේ සන්නමද

කුසලානයක් නොව

ගර්වයෙන් ඔසවා

කරතබාගත් කුරුසියයි ඔය

මේ හුස්ම ද, ජීවිතයද

පා යට ඇති වැලිද

හිමිය එක ලෙස

උන් දුන් දෙයක් නොව

ජය නම් එයයි

නිදහස් මිනිසෙකුව

ඉපිද පැවත මියෙන එක.

© ඩිලන්ත පණ්ඩුක රත්නායක

2018 ඔක්තෝබර්

(Inspired by the legend of "Spartacus" who was trembled the great Roman Empire by his will upon the freedom)

Picture retrieved from: https://www.ancient.eu/article/871/the-spartacus-revolt/