කිරුළ සහ වලිගය

ඔවුනට හැකිය මවනට නිසැක

ඔබ හිස මතට කිරුළක්...

එසැනම වලිග කොටයක්...

වදනින් මවන ඔබ පිට සපන

ඇට මැසි සපුන් කැලතක්...

නැත උන් මඩින විදිහක්...

පැවසුම් අතර කට කොන නඟන

සිනහව බරැති අවියක්...

හිමි හිත් හදන බිරැමක්...

ඔවුනට හැකිය දිවගින් ගන්ට

මළ පිඩු යටවූ මස්සක්...

එහෙනම් ඕන අස්සක්...

© ඩිලන්ත පණ්ඩුක රත්නායක

28/04/2020

Image retrieved from: https://ideas.ted.com/dont-get-fooled-or-conned-again-here-are-the-5-tactics-to-look-out-for/

(නිමිත්ත - මාධ්‍ය ප්‍රතිරූප )

කාබන් පිය සටහන්

ටොන් ගාණක් වුවත්

එකතු කළ හැකි

ප්‍රතිපූර්ණය කළ නොහැකි

සීතල පාද පත්ලෙහි තැවරුණ

කාබන් වූ...සීතල වූ...

මිනිස් සුසුම්..

ඔය.. ඔය ..ඔබෙත්

නිහඬව සිටින මගෙත්

පා සටහන් අතරෙහි ම

ඇත..

පෙනෙනු නැත..

ඒ සිටවූ පැළ අතර...

_____________________________________

© ඩිලන්ත පණ්ඩුක රත්නායක

2019 ඔක්තෝම්බර්

(නිමිත්ත - ඔවුන් ආඩම්බරයෙන් කියූ ලෙස ඒ ලොව පළමු කාබන් හරණ ජනපතිවරණ ප්‍රචාරක වැඩසටහනයි. 2019 අග ලංකාවේ පැවැත්වුනි. එ දෙස බලා සිටින්නෙමු)

source: http://www.ft.lk/news/World-s-first-carbon-sensitive-environmentally-friendly-election-campaign/56-688820

සාතන්ගේ මෙහෙකරුවෝ

සාතන්ගේ මෙහෙකරුවෝ

_______________

ඕ දාර්ශනිකය...

සාතන්ට කව් පබදින...

මතුරන දෙතොල් මත

විටෙක කෙස් කඩමින...

කියන..

ගලවා ගනු මැනව ලෝකය

තනනු මැන මන්දිර මහා මාවත්...

පා ඇගිලි අතරින් මිරිකෙන කෑ ගසන..

පණුවන් මැඩ..

පොලෝ පලා එනු මැන

මා ගවසමි මල් ගෙල

අර බලන්න

දනන් ඇසිපිය නොසලන

අප පසුපසම එන

දාර්ශනිකය.. ඉදින් නිදන්න..

සිහින බලන්න..

නොනැගිටින්න

ස්වාමියා සන් කරන තුරු..

නැගිටින්න

නුඹටත් අහිමි

නුඹේ දාර්ශනික වැකිවලින් බිහිරි ව

තන නිල්ල මත නිල් අහස යට

අමළ සොම්බිලන්තයකට

©ඩිලන්ත පණ්ඩුක රත්නායක

2018 සැප්තැම්බර්